Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
07. mars 2025 Utanríkisráðuneytið

Föstudagspóstur 7. mars 2025

Heil og sæl.

Þorgerður Katrín Gunnarsdóttir utanríkisráðherra og Kristrún Frostadóttir forsætisráðherra ítrekuðu stuðning Íslands við varnarbaráttu Úkraínu í kjölfar fundar Volodómír Selenskí Úkraínuforseta með valdhöfum í Hvíta húsinu fyrir viku síðan.

Þá ítrekaði Þorgerður Katrín mikilvægi þess að Úkraínu verði áfram sýndur stuðningur og varnir hennar styrktar eftir grimmilega árás Rússa í dag sem beint var gegn borgaralegum innviðum.

Utanríkisráðherra skrifaði á mánudaginn undir rammasamninga við fjögur íslensk félagasamtök sem starfa að þróunarsamvinnu, þ.e. Rauða krossinn á Íslandi, Hjálparstarf kirkjunnar, Barnaheill – Save the Children á Íslandi og SOS barnaþorpin á Íslandi.

  

Íslensk stjórnvöld undirstrikuðu ófrávíkjanlegar skyldur Ísraels sem hernámsaðila að mannúðarrétti í greinargerð sem skilað var í síðustu viku til Alþjóðadómstólsins í Haag í ráðgefandi álitsmáli sem dómstóllinn hefur til umfjöllunar. Þá árétta stjórnvöld sömuleiðis ábyrgð Ísraels á að tryggja að þær stofnanir sem Sameinuðu þjóðirnar hafa falið sérstök hlutverk gagnvart íbúum á hernumdum svæðum Palestínu geti sinnt hlutverki sínu, þar á meðal Palestínuflóttamannaaðstoð Sameinuðu þjóðanna (UNRWA). Kristján Andri Stefánsson, sendiherra Íslands gagnvart Hollandi, afhenti greinargerðina fyrir hönd íslenskra stjórnvalda.

 

Jónas G. Allansson, skrifstofustjóri varnarmálaskrifstofu utanríkisráðuneytisins, tók í vikunni þátt í umræðu um konur, frið og öryggi í breyttum heimi í tilefni af alþjóðlegum baráttudegi kvenna 8. mars næstkomandi. ÖBÍ réttindasamtök og UN Women á Íslandi stóðu fyrir viðburðinum í samstarfi við sendinefnd Evrópusambandsins á Íslandi. Í innleggi sínu lagði Jónas meðal annars áherslu á að ályktanir öryggisráðs Sameinuðu þjóðanna um konur, frið og öryggi varða hagsmuni allra kynja. Jónas greindi frá því hvernig varnarmálaskrifstofa hefur innleitt kynjasjónarmið í sínum störfum og stutt við aukna þátttöku kvenna á sviði öryggis- og varnarmála, bæði innanlands og á vegum Íslands erlendis.

  

Hlutverk Alþjóðabankans á tímum örra breytinga, skertrar fjármögnunar til þróunarsamvinnu og erfiðrar skuldastöðu fjölmargra þróunarríkja var meðal þess sem rætt var á fundi fulltrúa kjördæmis Norðurlandanna og Eystrasaltsríkjanna (NB8) í Alþjóðabankanum með Ajay Banga, forseta bankans, í Stokkhólmi í vikunni. Vandinn sem fátækustu ríkin standa frammi fyrir er gríðarlegur og fer vaxandi á sama tíma og dregið hefur úr stuðningi við þau. Elín Rósa Sigurðardóttir, skrifstofustjóri þróunarsamvinnuskrifstofu, sótti fundinn fyrir Íslands hönd.

  

Kvikmyndahátíðin Vision Nordique: French Nordic Film Days fer nú fram í París og stendur fram á sunnudag. Snerting var opnunarmynd hátíðarinnar sem er samstarfsverkefni kvikmyndastofnana allra Norðurlandanna undir merkjum The Five Nordics, frönsku kvikmyndastofnunarinnar CNC, sænsku menningarstofnunarinnar í París, frönsku menningarstofnunarinnar í Svíþjóð og norrænu sendiráðanna í Frakklandi, með stuðningi frá Norrænu ráðherranefndinni. Unnur Orradóttir Ramette, sendiherra í París, hélt opnunarræðu hátíðarinnar og annar aðalleikari myndarinnar, Pálmi Kormákur, sat fyrir svörum eftir sýninguna. Þá stóðu sendiráð Íslands og Finnlands í samstarfi við menningarstofnun Finnlands í París fyrir móttöku í tilefni opnunarinnar.

  

UNESCO hélt í dag alþjóðlega ráðstefnu um stöðu kvenna og stúlkna í Afganistan í tengslum við alþjóðlegan baráttudag kvenna. Ráðstefnan er tilkomin að frumkvæði Íslands og flutti Þorgerður Katrín Gunnarsdóttir myndbandsávarp. Þar lagði hún áherslu á hlutverk alþjóðasamfélagsins í baráttunni fyrir mannréttindum afganskra kvenna og stúlkna.

Sýningin Boreal Heat, sem er samsýning íslenska myndlistarfólksins Ástríðar Ólafsdóttur, Bjarkar Viggósdóttur og Reinars Foreman var opnuð í Galerie de Buci í 6. hverfi Parísar í vikunni, í samstarfi við sendiráð Íslands í París. Sýningaropnunin var mjög vel sótt og hlaut góðar viðtökur viðstaddra. Unnur Orradóttir Ramette, sendiherra Íslands í París, ávarpaði sýningargesti við opnunina.

  

Á Íslandi má finna tvo alþjóðlega UNESCO jarðvanga við Kötlu og Reykjanes og sóttu fulltrúar þeirra ráðstefnu í höfuðstöðvunum í París í tilefni af tíu ára afmæli alþjóðlegs tengslanets jarðvanga. Þau færðu fastanefnd veglega bókagjöf um Reykjanes jarðvanginn og var þeim þakkað fyrir.

Þá tísti Unnur um þátttöku hennar í verkefninu ambassador for a day sem breska sendiráðið stóð fyrir í tilefni af alþjóðlegum baráttudegi kvenna.

Hanna Katrín Friðriksson atvinnuvegaráðherra var stödd í Berlín á ferðamannaráðstefnunni ITB Berlin. Auðunn Atlason sendiherra og hans fólk stóðu fyrir móttöku af því tilefni í sendiráðsbústaðnum þar sem fulltrúar Icelandair og Íslandsstofu tóku meðal annarra þátt.

  

Þá áttu Auðunn og Ingólfur Friðriksson, deildarstjóri Evrópumála í utanríkisráðuneytinu, fund með þýskum kollegum frá kanslaraembættinu, utanríkisráðuneytinu og viðskiptaráðuneytinu um Evrópumál og EES-samninginn.

Pétur Óskarsson formaður Samtaka ferðaþjónustunnar heimsótti sendiráðið í Berlín í vikunni.

  

Benedikt Kristjánsson tenór kom fram í Berlínar Philharmoníunni.

  

Lögrétta, félag laganema við Háskólann í Reykjavík, heimsótti nýverið sendiráðið í London og fékk þar kynningu á starfsemi sendiráðsins og utanríkisráðuneytisins. Þar svaraði Jóhanna Jónsdóttir, varamaður sendiherra, spurningum sem nemendurnir höfðu um hin margvíslegu störf sendiráðsins.

  

Sturla Sigurjónsson, sendiherra í London, heimsótti á dögunum safn tileinkað minningu hönnuðarins, skáldsins og Íslandsvinarins William Morris. Morris sótti Ísland oft heim, fyrst árið 1871, og var Ísland honum mikill innblástur í skrifum og hönnun. Morris og fjölskylda ræktuðu samband sitt við Ísland alla ævi og May Morris, dóttir skáldsins, var sæmd hinni íslensku fálkaorðu árið 1930.

  

Sendiráð Norðurlandanna í London stóðu í vikunni fyrir viðburði í breska þinghúsinu um konur og lýðræði. Viðburðurinn var haldinn í samstarfi við þingnefnd kvenna (All-Party Parliamentary Group Women in Parliament) og bresk-norrænu þingnefndina (All-Party Parliamentary Group Nordic Countries). Meðal viðmælenda voru Kristina Háfoss, framkvæmdastjóri skrifstofu Norðurlandaráðs, og fulltrúar þinghópanna. Gestir nýttu tækifærið til þess að deila þekkingu milli Norðurlandanna og Bretlands, um hvernig best sé farið að því að tryggja réttindi kvenna til þátttöku í lýðræði. Jóhanna Jónsdóttir, varamaður sendiherra, var viðstödd viðburðinn ásamt varamönnum norrænu sendiráðana.

  

Bolludeginum var fagnað í nokkrum sendiráðum.

  

  

  

Stefán Haukur Jóhannesson, sendiherra í Tókýó, hélt kynningu í Tama City í Tókýó um umhverfisstefnu Íslands. Þar gæddi hann sér á pylsum sem reiddar voru fram á íslenskan máta.

  

  

Einar Gunnarsson, fastafulltrúi í Genf, fór yfir mikilvægi þess að mannréttindi kvenna, stúlkna, hinsegin fólks og minnihlutahópa væru virt í hvívetna. Ávarpið flutti hann í yfirstandandi vetrarlotu mannréttindaráðs Sameinuðu þjóðanna. Fastanefndir Norðurlandanna í New York tjáðu sig um beitingu Rússa á neitunarvaldi í öryggisráði Sameinuðu þjóðanna í síðustu viku og hvöttu þá til að beita því á skynsamlegan hátt og í samræmi við stofnsáttmála Sameinuðu þjóðanna. Sendiráðið í Washington D.C. fékk í heimsókn nemendur við stjórnmálafræðideild Háskóla Íslands á dögunum. Sendiráð Íslands í Washington bauð til mótttöku fyrir þátttakendur NATO ACO POLAD ráðstefnunnar sem fram fór í Washington og Norfolk í vikunni. Á myndinni eru Ragnhildur Arnórsdóttir, sendiráðunatur í sendiráðinu í Washington, ásamt Kelly Degnan, sendiherra og utanríkismálaráðgjafa formanns bandaríska herráðsins, og Jóna Sólveig Elínardóttir sendiráðunautur og starfsmaður utanríkisráðuneytisins í Norfolk. María Mjöll Jónsdóttir, skrifstofustjóri skrifstofu alþjóðapólitískra málefna í utanríkisráðuneytinu, sótti Peking heim í vikunni. Hún átti fundi með Li Jian, skrifstofustjóra Evrópuskrifstofu kínverska utanríkisráðuneytisins um tvíhliða samskipti ríkjanna og væntanlegan Peking +30 viðburð í Peking, Chen Danhong, skrifstofustjóra alþjóðaskrifstofu náttúruauðlindaráðuneytisins, um norðurslóðasamstarf ríkjanna, og Shen Bo, skrifstofustjóra fjölþjóðasamstarfs í utanríkisráðuneytinu um stöðu Sameinuðu þjóðanna í dag og fjölþjóðasamstarfs, áherslur Íslands í mannréttindaráði Sameinuðu þjóðanna, árásarstríð Rússlands í Úkraínu, og væntanlega ráðstefnu í Peking í tilefni af Peking +30. Loks sat hún hádegisverðarfund í boði Hua Chunying, varautanríkisráðherra Kína, þar sem rædd voru samskipti ríkjanna á þeim 30 árum sem sendiráð Íslands hefur verið í Peking, hnattrænar áskoranir og árásarstríð Rússlands í Úkraínu.

Sendiráð Íslands í Peking skipulagði málstofu um konur og endurnýjanlega orku í húsakynnum þess í tilefni af því að nú í á eru 30 ár liðin frá því að Ísland opnaði sendiráð í Peking. Færri komust á ráðstefnuna en vildu, en sendiráðið varð að loka fyrir skráningu viku fyrir hana vegna fjölda skráninga.

Fleira var það ekki þessa vikuna — góða helgi!

Kveðja,

Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta