Framvinda verkefnisins

Markmið

Uppbyggingu vega, hafna og flugvalla hraðað með auknum framkvæmdum og viðhaldi með það að markmiði að auka umferðaröryggi, stytta vegalengdir milli byggða og styrkja samkeppnishæfni landshluta. Auknu fjármagni er forgangsraðað samkvæmt samgönguáætlun til  framkvæmda og viðhalds vega, hafna og flugvalla. Fjármögnun í formi samvinnuverkefna eykur enn á hraða uppbyggingar, þjóðhagslega arðbærra innviða.

Staða

Stóraukið fjármagn var sett í vegaframkvæmdir, hafnir og flugvelli í endurskoðaðri samgönguáætlun fyrir tímabilið 2020-2034 sem samþykkt var á Alþingi í júní 2020. Framlög til vegagerðar á fjárlögum hækkuðu um 4 milljarða á ári frá því sem áður var á fyrsta tímabili áætlunarinnar 2020-2024. Þá voru til viðbótar 6,5 ma.kr. settar í uppbyggingu samgönguinnviða 2020 í fjárfestingarátaki ríkisstjórnarinnar vegna Covid-19 faraldursins. Miðað er við að með samþykkt fjármálaáætlunar og fjárlaga verði fé til uppbyggingar samgönguinnviða aukið enn frekar árin 2021 og 2023. Fjölmörgum framkvæmdum er flýtt á tímabili áætlunarinnar með áherslu á að bæta umferðaröryggi og tengingar milli byggða. 

Alþingi samþykkti frumvarp um samvinnuverkefni í uppbyggingu samgönguinnviða árið 2020. Sex verkefni eru tilgreind í lögunum og er stefnt að því að þau verði þróuð áfram með það að markmiði að fela einkaaðilum eftir atvikum hönnun, framkvæmd, rekstur og viðhald til ákveðins tíma. Í lögunum er gert ráð fyrir að heimilt verði að innheimta veggjöld til þess að standa straum af framkvæmda- og rekstrarkostnaði.

• Nánar um samgönguáætlun 2020-2034
• Miklar fjárfestingar í samgöngum, fjarskiptum og byggðamálum til að vinna gegn samdrætti (frétt 31. mars 2020)
• Skýrsla starfshóps um fjármögnun samgangna
  
  

Ábyrgð

Samgöngu- og sveitarstjórnarráðuneytið

Kafli

Sterkt samfélag