Viðskipti
Öflug viðskipti við útlönd og kraftmikið efnahagslíf er undirstaða velferðar á Íslandi. Á viðskiptasviði utanríkisráðuneytisins er unnið að því að gæta hagsmuna íslenskra ríkisborgara, íslenskra fyrirtækja og neytenda með því að tryggja þeim aðgang að alþjóðamörkuðum og efla fríverslun.
Sendiráð Íslands í Osló sinnir viðskiptaþjónustu, ferðamálum og menningarkynningu, en m.a. veitir sendiráðið íslenskum fyrirtækjum í Noregi og í öðrum umdæmislöndum sendiráðsins aðstoð í samstarfi með Íslandsstofu, Viðskiptaráði, Fjárfestingastofu og öðrum hlutaðeigandi stofnunum og hagsmunasamtökum í því augnamiði að stilla saman strengi allra þeirra sem starfa að viðskiptum, ferðamálum og menningarkynningu á erlendri grund.
Frekari upplýsingar má finna á vef viðskiptaþjónustu utanríkisráðuneytisins.
Íslandsstofa er samstarfsvettvangur atvinnulífs og stjórnvalda og miðar að því að auka gjaldeyristekjur þjóðarinnar með því að efla markaðssókn Íslendinga erlendis. Íslandsstofa aðstoðar íslensk fyrirtæki og einstaklinga sem huga að útflutningi og býður m.a. upp á fræðslufundi og námskeið sem efla samkeppnisfærni íslenskra fyrirtækja og skýra innviði erlendra markaða. Jafnframt er íslenskum fyrirtækjum boðið uppá faglega aðstoð við sölu á vörum, þjónustu og þekkingu á erlendum mörkuðum í samstarfi við sendiráðin sem styður við kynningu á íslenskri menningu ytra.
Mörg íslensk fyrirtæki hafa undanfarið sótt til Noregs. Viðskiptaumhverfið er svipað og á Íslandi og Noregur er góður stökkpallur út í Evrópu.
Viðskiptafulltrúi sendiráðsins í Osló er Heba Líf Jónsdóttir, [email protected]
Norsk-íslenska viðskiptaráðið (NIH) hefur það að markmiði að efla og viðhalda traustum viðskiptatengslum milli Noregs og Íslands.
Viðskiptaráðið er góður vettvangur fyrir fyrirtæki, stofnanir og einstaklinga til að styrkja tengslanet sitt en ráðið stendur fyrir fundum og ráðstefnum um málefni sem tengjast viðskiptum milli Íslands og Noregs.
Með því að gerast meðlimur í ráðinu er hægt að fá greiðan aðgang að hópi íslenskra fyrirtækja sum með langa reynslu af viðskiptum í Noregi auk þess sem ráðið getur aðstoðað við uppsetningu funda og skipulagningu heimsókna milli landanna.
Frekari upplýsingar eru á heimasíðu Norsk-íslenska viðskiptaráðsins.
Ísland flutti út vörur til Noregs að verðmæti 54 milljörðum ISK árið 2023, en Noregur er einn helsti útflutningsmarkaður Íslands. Helstu útflutningsvörur Íslands til Noregs eru sjávarafurðir, sem telja yfirleitt um 70% af heildarútflutningi hvers árs. Má það meðal annars rekja til eftirspurnar eftir fiskimjöli sem notað er í miklum mæli við laxeldi. Frá Noregi er það helst jarðeldsneyti sem flutt er til Íslands.
Hægt er að nálgast nákvæmt talnaefni yfir útflutning á heimasíðu Hagstofu Íslands
Undanfarin ár hefur töluvert af íslenskum fyrirtækjum í sjávarútvegi, byggingariðnaði og samgöngumannvirkjum, verkfræðingar, arkitektar og hönnuðir sótt á norska markaðinn með góðum árangri. Mörg fyrirtækjanna hafa opnað útibú í Noregi ellegar gert samstarfssamning við norsk fyrirtæki.
Nytsamlegir tenglar í norsku viðskiptalífi:
- Altinn - Upplýsingar fyrir fyrirtæki m.a. um stofnun fyrirtækja í Noregi
- Viðskiptaráðuneytið
- Hagstofa Noregs
- Verslunarráð Osló - Oslo Handelskammer
- Innovasjon Norge
- Proff Business finder - leit að fyrirtækjum
- Skrá yfir útflutningsfyrirtæki
- Stéttarfélög
- Dagens næringsliv - viðskiptadagblað
- e24 - viðskiptanetsíða
- Upplýsingasíða Norðurlandaráðs – Vinna í Noregi
- Nordisk eTax – skattaupplýsingar fyrir Norðurlönd á íslensku
.png?proc=SmallImage)
Eitt af hlutverkum sendiráðs Íslands í Osló er að efla enn frekar viðskiptatengsl Íslands og Noregs og veitir sendiráðið í því skyni viðskiptaþjónustu til fyrirtækja og annarra sem vilja sækja á norskan markað og/eða á markaði í öðrum umdæmislöndum sendiráðsins.
Til að gera þetta mikilvæga hlutverk markvissara og sýnilegra hafa gagnlegar upplýsingar um viðskipti milli Íslands og Noregs síðustu ár verið teknar saman. Upplýsingarnar veita innsýn í helstu viðskipti milli landanna og hvað það er sem hefur haft hvað mestu áhrif á þau viðskipti síðustu ár. Til að mynda loðnubrestur á Íslandi, hækkun á olíuverði í Noregi og síðast en ekki síst kórónuveirufaraldurinn. - Skjalið var unnið úr tölum frá Hagstofan.
