19. desember 2018

Ísland tekur við formennsku vestræna ríkjahópsins hjá UNESCO

Kristján Andri Stefánsson, sendiherra og fastafulltrúi Íslands hjá UNESCO, tekur við formennskunni af breska starfsbróður sínum. Matthew Lodge - mynd — Kristján Andri Stefánsson, sendiherra og fastafulltrúi Íslands hjá UNESCO, tekur við formennskunni af breska starfsbróður sínum. Matthew Lodge

Kristján Andri Stefánsson, sendiherra og fastafulltrúi Íslands gagnvart UNESCO tók í dag fyrstur Íslendinga við keflinu sem formaður hins svokallaða vestræna ríkjahóps hjá UNESCO (ríkjahóps 1). Ísland tók við formennskunni af Bretum.

Vestræni ríkjahópurinn samstendur af ríkjum Vestur-Evrópu og Norður-Ameríku. Í formennskunni felst auk fundarstjórnar að samhæfa afstöðu ríkjahópsins, miðla málum og koma fram fyrir hönd hópsins út á við, bæði gagnvart öðrum ríkjahópum og stofnuninni sjálfri.

Íslands hefur ekki áður gegnt formennsku í ríkjahópnum. Formennskan er liður í virkari þátttöku Íslands í starfsemi stofnunarinnar í aðdraganda framkvæmdastjórnarkjörs UNESCO árið 2021, þegar Ísland verður í framboði. Einnig er unnið að því að auka samstarf við stofnunina á sviði þróunarsamvinnu.