10. janúar 2019

Afhending trúnaðarbréfs í Portúgal

Kristján Andri Stefánsson afhenti í dag Marcelo Rebelo de Souza forseta trúnaðarbréf sitt sem sendiherra Íslands í Portúgal. Afhendingin fór fram við hátíðlega athöfn í forsetahöllinni í Lissabon, Palácio de Belém, að viðstaddri Teresa Ribeiro aðstoðarutanríkisráðherra og háttsettum embættismönnum.

Við þetta tækifæri ræddu þeir farsæl samskipti og viðskipti milli landanna fyrr og síðar og möguleika á að auka samstarf þeirra frekar undir merkjum Uppbyggingarsjóðs EES, sér í lagi að því er varðar verkefni tengd jafnréttismálum annars vegar og hafinu og bláa hagkerfinu hins vegar. Í því samhengi greindi sendiherra frá forystuhlutverki Íslands í Norrænu ráðherranefndinni og Norðurskautsráðinu á þessu ári og vakti athygli á höfuðáherslum í formennskuáætlunum Íslands, m.a. að því er varðar bláan vöxt, sjálfbæra ferðamennsku og ungt fólk.

Í för sinni mun sendiherra jafnframt eiga fleiri fundi með viðeigandi stjórnvöldum til að fylgja þessum samstarfsmöguleikum eftir.