Pallborðsumræður um jafnrétti og útrýmingu launamisréttis

Í gærkvöldi, þann 10. apríl, stóð sendiráð Íslands í Washington DC fyrir pallborðsumræðum um jafnrétti, í samstarfi við samtökin Institute for Education, sem bar yfirskriftina „Gender Equity – Equal Pay – How do we get there?“.

Geir H. Haarde sendiherra hélt opnunarávarp og Hreinn Pálsson starfsmaður sendiráðsins sá um fundarstjórn. Áhugaverðar pallborðsumræður áttu sér stað en í þeim tóku þátt tveir fulltrúar frá Íslandi og tveir frá Bandaríkjunum með bakgrunn úr menntamálum, mannauðstjórnun, fjölmiðlum og tæknigeiranum, þau Margrét Pála Ólafsdóttir, frumkvöðull, stofnandi Hjallastefnunnar og uppeldis- og menntafræðingur, Drífa Sigurðardóttir sérfræðingur á sviði mannauðsstjórnunar, Shane Green, framkvæmdastjóri og frumkvöðull í tæknigeiranum og athafnakonan Nina Easton stofnandi og eigandi SellersEaston Media, fyrrverandi blaðamaður og álitsgjafi.

Fjallað var um stöðu jafnréttismála í báðum löndum og dæmi gefin um aðgerðir sem hafa gagnast til að rétta stöðu kvenna og karla og útrýmingu launamisréttis. Meðal þess sem bar á góma var menningarleg áhrif og viðhorf í samfélaginu, gen, valdefling og mikilvægi þátttöku fjölskyldunnar allrar í barnauppeldinu. Margrét Pála lagði áherslu á að þrátt fyrir að Ísland sé efst á lista þjóða í jafnréttismálum þá væri enn verk að vinna og nefndi sem dæmi að konur væru enn í miklum minnihluta í stjórnum fyrirtækja á Íslandi. Þá fjallaði hún um mikilvægi þess að vinna með drengjum og stúlkum frá unga aldri til að ná árangri í jafnréttismálum.