Aukaþing vegna heimsfaraldursins hjá Sameinuðu þjóðunum í New York

Aukaþing leiðtoga aðildarríkja Sameinuðu þjóðanna um COVID-19 heimsfaraldurinn er nú haldið í New York dagana 3.-4. desember. Tilgangur aukaþingsins er að sameina leiðtoga heims í viðbrögðum sínum við heimsfaraldrinum. Ávarpa leiðtogar þingið á skjá, en fastanefndir sinna störfum í sal allsherjarþingsins.

Forseti allsherjarþingsins og framkvæmdastjóri Sameinuðu þjóðanna slógu tóninn í upphafi og fóru yfir geigvænlegar afleiðingar heimsfaraldursins. Faraldurinn hefði opinberað og hert á veikleikum sem fyrir voru og sem fyrr væru það fátækari ríki, konur, börn og minnihlutahópar sem yrðu verst úti. Viðbrögð Sameinuðu þjóðanna hefðu verið með margvíslegum hætti - allt frá ákalli um vopnahlé á heimsvísu til aðstoðar á vettvangi í fjölda aðildarríkja.

Í máli forystumanna SÞ var lögð rík áhersla á að ríki heims hefðu jafnt aðgengi að bóluefni og að fylgt yrði heimsmarkmiðunum í enduruppbyggingu samfélaga með sjálfbærari hætti. Einnig hefði reynslan undanliðna mánuði glögglega sýnt fram á vægi alþjóðlegrar samvinnu í baráttu við ógn sem engin landamæri virti. Hefðu Sameinuðu þjóðirnar þar lykilhlutverki að gegna.

Forsætisráðherra Íslands, Katrín Jakobsdóttir, flutti ræðu fyrir Íslands hönd og lagði meðal annars áherslu á jafnrétti og hlut kvenna í faraldrinum, sem og mikilvægi jafns aðgengis að bóluefni og nauðsyn þess að byggja upp betur og grænna.