Íslensk nýsköpun í indverska efnahagsvextinum: Kynning í Nýju-Delhí
Hagstætt viðskiptaumhverfi á Indlandi og íslenskt hugvit var meginviðfangsefnið á málstofu fyrir íslensk nýsköpunarfyrirtæki, sem haldin var af sendiráði Íslands í Nýju-Delhi, Invest India og Íslensk-indversku viðskiptasamtökunum (IIBA) 7. mars 2023.
Martin Eyjólfsson ráðuneytisstjóri sagði m. a. í ávarpi sínu, að fyrirtækjum væri nauðsynlegt að geta starfað í eðlilegu markaðshagkerfi og réttarkerfi, þar sem fyrirtæki gætu skotið ágreiningi til sjálfstæðra dómsstóla. Indland, fjölmennasta lýðræðisríki í heimi, væri framtíðarvettvangur fyrir íslensk nýsköpunarfyrirtæki, og Ísland hefði mikið fram að færa með sérþekkingu í jarðvarma og á fleiri sviðum.
Varaforseti Invest India, Varda Taneja, lýsti viðskiptaumhverfinu á Indlandi, miklum hagvexti og fjárfestingum og taldi mikla samstarfsmöguleika með Íslandi. Invest India, sem er viðskiptaþjónusta á vegum viðskiptaráðuneytisins, kynnti einnig starf sitt að orkumálum og sjávarútvegi.
Um 50 manns tóku þátt í málstofunni, þ. á m. fulltrúar frá fyrirtækjunum Marel India, Kerecis, Carbon Recycling International, GEG Power jarðvarmafyrirtækið og Össur India, sem kynntu starfsemi sína.
Á meðal þátttakenda voru fulltrúar frá ríkisorkufyrirtækjunum ONGC og India Oil, ráðuneytum endurnýjanlegrar orku, olíu og jarðgass og sjávarútvegs, matvælaeftirlits sjávarútvegsins (MPEDA) og sjúkrahúsa og fyrirtækja í heilsugæslu og sjávarútvegi.