Ísland fjármagnar orkubúnað til Úkraínu í samstarfi við UNDP

Ísland færði Úkraínu orkubúnað í síðustu viku sem styður við starfsemi sjö raforkustöðva víðs vegar í landinu. Um er að ræða samstarfsverkefni Íslands og Þróunaráætlunar Sameinuðu þjóðanna (UNDP) en ráðuneytisstjóri utanríkisráðuneytisins tók þátt í afhendingarathöfn í gegnum fjarfundabúnað þar sem Ísland, ásamt Suður-Kóreu, færðu úkraínska orkufyrirtækinu Ukrenergo búnaðinn. 

„Efling orkuinnviða er mikilvægur þáttur í stuðningi Íslands við Úkraínu,“ segir Þórdís Kolbrún Reykfjörð Gylfadóttir utanríkisráðherra. „Orkuinnviðir eru illa farnir sökum kerfisbundinna árása Rússlands sem hefur, eins og gefur að skilja, mikil áhrif á daglegt líf íbúa landsins. Þetta verkefni er frábært dæmi um öflugt samstarf Íslands við stofnanir Sameinuðu þjóðanna, og önnur ríki, í þágu Úkraínu. Ísland mun halda áfram að mæta þörf Úkraínu þar sem hún er mest, og á þeim sviðum þar sem sérþekking Íslands kemur að góðum notum.“

Verkefnið er hluti af stærra verkefni UNDP í orkumálum í Úkraínu en framlag Íslands til þess nam 500 þúsund bandaríkjadölum á síðasta ári.

Orkuinnviðir í Úkraínu hafa sætt kerfisbundnum árásum af hendi Rússlands frá því allsherjarinnrás Rússa hófst í febrúar 2022. Ísland hefur auk framangreinds framlags veitt fjármagni í orkusjóð fyrir Úkraínu (Ukraine Energy Support Fund) á vegum evrópsks samstarfsvettvangs um orkumál (Energy Community) auk þess sem stuðningur íslenskra stjórnvalda við Úkraínu sem fer um Alþjóðabankann snýr að uppbyggingu orkuinnviða í landinu. Þá hafa íslensk dreifi- og veitufyrirtæki, í samstarfi við utanríkisráðuneytið, sent nauðsynlegan raforkubúnað af ýmsu tagi til Úkraínu, að verðmæti 60 milljón króna.