Utanríkisráðherra fundar með ráðamönnum í Póllandi
Staða alþjóðamála, aukið Evrópusamstarf á sviði öryggis- og varnarmála, mikilvægi innri markaðarins, og góð tvíhliða samskipti voru helstu umræðuefnin á fundum Þorgerðar Katrínar Gunnarsdóttur utanríkisráðherra með Radoslaw Sikorski, utanríkisráðherra Póllands, og Ignacy Niemczycki, aðstoðarráðherra Evrópumála í forsætisráðuneyti Póllands, sem fram fóru í Varsjá í dag.
„Það var gott að koma til Varsjár og finna það vinarþel sem ríkir í Íslands garð. Fundirnir með ráðherrunum undirstrikuðu mikilvægi okkar tvíhliða samskipta og það nána samstarf sem ríkin eiga á alþjóðavettvangi og innan Atlantshafsbandalagsins. Formennska Póllands í Evrópusambandinu gefur okkur auk þess enn frekar tækifæri til að stilla saman strengi varðandi innri markaðinn og EES-samstarfið. Þá gegnir Pólland lykilhlutverki í stuðningi við Úkraínu,“ segir Þorgerður Katrín.
Mikilvægi góðra samskipta yfir Atlantshafið voru sömuleiðis rædd og formennska Póllands í ráðherraráði Evrópusambandsins sem hófst í byrjun þessa árs.
Þá ræddu ráðherrarnir um mikilvægi áframhaldandi samstöðu með Úkraínu, varnartengdan stuðning, efnahags- og mannúðarstuðning, og áframhaldandi þvingunaraðgerðir gagnvart Rússlandi sem Ísland tekur fullan þátt í.
