Aðgerðir gegn netglæpum

Netglæpir eru glæpir eða afbrot samkvæmt hegningarlögum eða sérrefsilögum sem framin eru með tilstuðlan netsins.

Netglæpir eru í örum vexti og æ meiri áhersla er lögð á það á alþjóða vísu að bregðast við slíkri brotastarfsemi, enda eru þeir ekki vandamál eins lands vegna alþjóðlegs eðlis netsins. Alþjóðlegt samstarf um aðgerðir gegn netglæpum fer fram á grunni samnings Evrópuráðsins um tölvubrot og á vettvangi Evrópulögreglunnar EUROPOL.

Netöryggisstefna Íslands fyrir árin 2022-2037 kom út í febrúar 2022 og byggir fyrsta aðgerðaráætlun íslenskra stjórnvalda í netöryggi á henni. Í aðgerðaráætluninni, sem gildir fyrir árin 2022-2026, er að finna sjö aðgerðir sem dómsmálaráðuneytið ber ábyrgð á og stefnt er að fara í til að auka netöryggi á Íslandi og sporna við netglæpum. Aðgerðirnar eru eftirfarandi:

• Koma í kring fræðsluátaki um mikilvægi persónuverndar, miðlalæsis og netöryggis barna.
• Greining á valdheimildum stjórnvalda vegna netárása.
• Endurskoðun refsi- og réttarfarslaga varðandi afbrot tengd Netinu.
• Endurmat á skipulagi lögreglunnar til að takast á við netbrot.
• Auka fræðslu innan réttarvörslukerfisins um netglæpi.
• Auka vernd barna á netinu.
• Styrkja tæknilega getu lögreglunnar við rannsókn barnaníðsefnis.