Annar fundur fjármálastöðugleikaráðs á árinu 2019
Hluti af þeirri áhættu sem byggst hefur upp á síðastliðnum árum hefur nú komið fram. Gert er ráð fyrir samdrætti landsframleiðslu í ár en hvorki er vitað hversu mikill né langvinnur hann verður. Samdráttur í þjóðarbúskapnum mun óhjákvæmilega reyna á heimili og fyrirtæki og líkur eru á að hann leiði til aukinna vanefnda skuldbindinga með tilheyrandi áhrifum á fjármálakerfið. Hins vegar er óvíst hvernig skuldavöxtur einkageirans mun þróast. Dregið hefur úr verðhækkunum á íbúðar- og atvinnuhúsnæði enda hefur framboð aukist töluvert.
Viðnámsþróttur viðskiptabankanna er talsverður. Eiginfjárhlutföll þeirra allra eru nokkuð yfir kröfum Fjármálaeftirlitsins en lausafjárstaðan, einkum í íslenskum krónum, hefur versnað á síðustu mánuðum. Geta þjóðarbúsins til að takast á við áföll er góð eftir uppgang síðustu ára. Ytri staða þjóðarbúsins er jákvæð og skuldir hins opinbera og einkageirans litlar í sögulegu samhengi. Peningastefnan og ríkisfjármálin búa við hagstjórnarsvigrúm til að bregðast við þeim aðstæðum sem upp kunna að koma og gjaldeyrisforði Seðlabankans er stór.
Samþykkt var að beina tilmælum til Fjármálaeftirlitsins um að halda sveiflujöfnunarauka óbreyttum.