Breytingar á regluverki Jöfnunarsjóðs sveitarfélaga framundan
Þriðji ársfundur Jöfnunarsjóðs sveitarfélaga fór fram í dag og sagði Ögmundur Jónasson, samgöngu- og sveitarstjórnarráðherra, að framundan væri að meta tillögur starfshóps um breytingar á regluverki Jöfnunarsjóðsins í því skyni að bæta úr því.
Ráðherrann nefndi að nú lægju fyrir tillögur starfshóps um breytingar á reglum Jöfnunarsjóðsins þar sem meðal annars væri lagt til að þróað yrði nákvæmt útgjaldajöfnunarkerfi sem gefi nauðsynlegan grunn til að meta útgjaldaþörf sveitarfélaga. Sagði hann að skipaður verði vinnuhópur til að meta útgjaldaþörfina. Hann sagði brýnt að vinna málið áfram í samráði við sveitarstjórnarmenn og að hann legði mikla áherslu á að ná fram breytingum sem bæti regluverkið.
Að loknu ávarpi ráðherra flutti Elín Pálsdóttir, forstöðumaður Jöfnunarsjóðs, ársskýrslu sjóðsins og fór yfir fjárhag hans og verkefni. Tekjurs sjóðsins á síðasta ári voru alls 18,1 milljarður króna og framlög og rekstrarkostnaður alls um 18,6 milljarðar.
Þá ræddi Flosi Eiríksson, formaður starfshóps um endurskoðun á regluverki Jöfnunarsjóðs, um tillögurnar og Guðni Geir Einarsson, sérfræðingur hjá Jöfnunarsjóði, fjallaði um fjárhagsleg áhrif tillagna starfshópsins.