Fyrirmynd að samþykkt um stjórn sveitarfélaga gefin út
Innanríkisráðuneytið hefur gefið út auglýsingu um fyrirmynd að samþykkt um stjórn sveitarfélaga. Birtist hún í Stjórnartíðindum í gær, 20. nóvember, en tekur gildi 1. janúar á næsta ári.
Fyrirmyndin að samþykktinni er í níu köflum og taka þeir til hinna ýmsu sviða í stjórn sveitarfélaga, svo sem skipan sveitarstjórnar og verkefni sveitarfélags, fundarsköp, réttindi og skyldur sveitarstjórnarmanna, byggðaráð, samráð við íbúa og fleira.
Fyrirmynd að samþykktunum er unnin á grundvelli 9. gr. sveitarstjórnarlaga nr. 138/2011 og gildir sú fyrirmynd þar til ráðuneytið hefur staðfest sérstaka sambærilega samþykkt fyrir sveitarfélag. Um leið og auglýsingin tekur gildi hinn 1. janúar á næsta ári fellur úr gildi bráðabirgðaákvæði nr. IV áðurnefndra laga þess efnis að samþykktir um stjórn og fundarsköp sveitarfélaga sem eru í gildi við samþykkt laganna halda gildi sínu til 1. janúar 2013, að því leyti sem þær fara ekki í bága við ákvæði þeirra.
Þá hefur innanríkisráðuneytið gefið út auglýsingu um leiðbeiningar um ritun fundargerða sveitarstjórna. Markmið þeirra er að veita leiðsögn um ritun fundargerða sveitarstjórna, m.a. um hvað þar er skylt að bóka, um staðfestingu þeirra þegar að loknum fundi og skráningu og meðferð rafrænna fundargerða, sbr. 2. mgr. 19. gr. sveitarstjórnarlaga nr. 138/2011.