Sveitarfélögum fækkar um fimm á fyrri hluta ársins

Sameiningar Langanesbyggðar og Svalbarðshrepps annars vegar og Helgafellssveitar og Stykkishólmsbæjar hins vegar voru samþykkar með miklum meirihluta atkvæða íbúa í íbúakosningum í sveitarfélögunum laugardaginn 26. mars. Með niðurstöðum kosninganna er ljóst að 69 sveitarfélögum á landinu mun fækka um fimm niður í 64 á fyrri hluta ársins 2022.

Helgafellssveit og Svalbarðshreppur eru með fámennustu sveitarfélögum landsins með innan við 100 íbúa hvort sveitarfélag. Við sameininguna verður til sameinað 600 manna sveitarfélag á Norðurlandi eystra og ríflega 1.250 manna sveitarfélag á Snæfellsnesi.

Kosið var um þrennar sameiningar þann 19. febrúar síðastliðinn. Sameiningar Blönduósbæjar og Húnavatnshrepps annars vegar og Skagafjarðar og Akrahrepps hins vegar voru samþykktar. Á hinn bóginn var kosning um sameiningu Snæfellsbæjar og Eyja- og Miklaholtshrepps felld. Sameining Skútustaðahrepps og Þingeyjarsveitar gengur í gildi sama dag og sveitarstjórnarkosningar fara fram þann 14. maí næstkomandi. 

Stefna stjórnvalda miðar að því að ekkert sveitarfélag verði með undir 1.000 íbúa eftir sveitarstjórnarkosningar árið 2026. Nú eru í samráðsgátt stjórnvalda leiðbeiningar og rammi að áliti/greinargerð sveitarfélaga með undir 250 íbúa um stöðu sveitarfélaganna og getu þess til að sinna lögbundnum verkefnum. 

Frestur til að skila umsögnum um gögnin rennur út 13. apríl næstkomandi.

• Skoða drög að leiðbeiningum í samráðsgátt stjórnvalda
• Vefsvæði um sameiningar sveitarfélaga