Reykjadalur rampaður upp

Rampur númer 130 í átakinu Römpum upp Ísland var vígður við hátíðlega athöfn fyrr í dag, við sumarbúðirnar í Reykjadal. Athöfnin var vel sótt í gleði og spenningi. Bryndís Thors sem sækir sumarbúðirnar í Reykjadal árlega sá um að vígja rampinn. Við athöfnina tóku til máls Guðni Th. Jóhannesson, forseti Íslands, Unnur Ösp Stefánsdóttir, móðir Bryndísar, Andrea Rói Sigurbjörns, forstöðumaður sumarbúða í Reykjadal og Hörður Sigurðsson, formaður Styrktarfélags lamaðra og fatlaðra. Jón Jónsson, tónlistarmaður, tók einnig nokkur lög fyrir gesti og gangandi.

„Römpum upp Reykjadal! Reynum að hjálpa öllum að komast leiðar sinnar, hvar sem er og hvenær sem er. Fleiri rampa, færri tálma. Ég hlakka alltaf til að fá að taka þátt í viðburðum á vegum Römpum upp Ísland og er dagurinn í dag engin undantekning,“ sagði Guðni Th. Jóhannesson, forseti Íslands við þetta tækifæri.

„Kæru vinir, alltaf þegar við hjónin keyrum Bryndísi í árlega Reykjadalsferð sína þá fyllist hjarta mitt af þakklæti. Ég verð meyr, pínu hrygg en aðallega djúpt snortin og glöð. Mannauðurinn í starfsmannahópnum hér í Reykjadal er fágæt auðlind. Börnin eru mætt eftir langa bið í eftirvæntingu og mörg þeirra að upplifa einhvers konar hápunkt ársins, ef ekki lífsins. Við foreldrar verðum svo þakklát fyrir viðhorfið, metnaðinn og gleðina sem skín úr augum starfsfólks Reykjadals. Ár hvert mæta þau börnum, brosum þeirra, já, og stundum tárum yfir spennu og aðskilnaði við foreldra, en alltaf mæta þau þeim af virðingu, næmni og gleði,“ sagði Unnur Ösp Stefánsdóttir í ávarpi sínu.

Römpum upp Ísland hófst formlega með vígslu á fyrsta rampinum þann 23. maí í Hveragerði og er stefnt að því setja upp 1000 rampa um allt land á næstu fjórum árum. Stofnaður var sjóður með aðkomu fjölmargra fyrirtækja og aðila sem standa straum af kostnaði fyrir þá verslunar- og veitingahúsaeigendur sem taka þátt í verkefninu Römpum upp Ísland.

Haraldur Þorleifsson stjórnandi hjá Twitter og stofnandi hönnunarfyrirtækisins Ueno er hvatamaður verkefnisins. Innviðaráðuneytið og Jöfnunarsjóður sveitarfélaga eru meðal helstu styrktaraðila þess. 

Hægt er að kynna sér verkefnið nánar á vefsvæðinu rampur.is.