Halla Nolsøe Poulsen ráðin framkvæmdastjóri NORA
Halla Nolsøe Poulsen frá Færeyjum hefur verið ráðin framkvæmdastjóri Norræna Atlantshafssamstarfsins (NORA). Halla tekur við starfinu af Ásmundi Guðjónssyni, sem fer á eftirlaun eftir átta ár við stjórnvölinn hjá NORA.
Norræna Atlantshafssamstarfið (NORA) er ríkjasamstarf Íslands, Færeyja, Grænlands og strandsvæða í norður- og vesturhluta Noregs. NORA er með skrifstofur í Færeyjum og vinnur að því að efla og þróa samstarf í byggða- og atvinnumálum, nýsköpun og sjálfbærri þróun. Starfið hvílir á þremur grunnstoðum sem eru verkefnastuðningur, stefnumörkun og tengslamyndun. Norræna ráðherranefndin er með samstarfssamning við NORA og fær stofnunin einnig framlög frá aðildarlöndunum fjórum.
Halla er með meistaragráðu í stjórnmálafræði frá Háskólanum í Kaupmannahöfn en hefur einnig lagt stund á verkefnastjórnun. Síðustu þrjú ár hefur Halla gegnt stöðu sendiherra Færeyja á Íslandi. Áður starfaði hún sem sérfræðingur hjá Norðurlandaráði í Kaupmannahöfn, á skrifstofu lögmanns í Færeyjum og í utanríkis- og atvinnuvegaráðuneyti Færeyja en þar bar hún ábyrgð á þátttöku Færeyja í norrænu samstarfi Norrænu ráðherranefndarinnar.
Halla tekur til starfa 1. september nk.