Mannvirki

Nauðsynlegt er að mannvirki séu örugg og ógni hvorki lífi og heilsu manna né eignum og umhverfi. Því hafa stjórnvöld kappkostað að tryggja faglegan undirbúning mannvirkjagerðar og virkt eftirlit með því að kröfum um öryggi mannvirkja og heilnæmi sé fullnægt. Mikilvægt er að stuðla að góðri endingu og hagkvæmni mannvirkja, m.a. með því að tryggja að þau séu hönnuð þannig og byggð að þau henti íslenskum aðstæðum.

Lögum um mannvirki og byggingarreglugerð er ætlað að stuðla að því að þetta gangi eftir. Að auki er markmið þeirra að stuðla að vernd umhverfis með því að hafa sjálfbæra þróun að leiðarljósi við hönnun og gerð mannvirkja, að stuðla að tæknilegum framförum og nýjungum í byggingariðnaði, að tryggja aðgengi fyrir alla og að stuðla að góðri orkunýtingu við rekstur bygginga.

Húsnæðis- og mannvirkjastofnun fer með yfirumsjón byggingarmála á Íslandi en meginþungi byggingareftirlits í landinu er á höndum sveitarfélaganna sem ráða byggingarfulltrúa til að sinna útgáfu byggingarleyfa og framkvæmd byggingareftirlits.