Landskjörstjórn er sjálfstæð stjórnsýslunefnd sem hefur yfirumsjón með framkvæmd kosninga og annast framkvæmd kosningalaga. Landskjörstjórn heyrir stjórnarfarslega undir ráðherra sem fer með málefni kosninga.
Um Landskjörstjórn og framkvæmd kosninga á island.is.
Almennt netfang Landskjörstjórnar er [email protected].
Listabókstafir
Í lögum um starfsemi stjórnmálasamtaka nr. 162/2006 er kveðið á um hvernig standa skuli að umsókn um úthlutun á listabókstaf og staðfestingu á heiti stjórnmálasamtaka. Samkvæmt 2. gr. k. tekur dómsmálaráðuneytið saman skrá um listabókstafi og heiti stjórnmálasamtaka. Skráin skal birt í B deild Stjórnartíðinda eigi síðar en 8 vikum eftir hverjar almennar alþingiskosningar og hefur að geyma upplýsingar um heiti og listabókstafi þeirra stjórnmálasamtaka sem buðu fram lista í nýafstaðnum kosningum.
Ákvörðun ráðuneytisins um úthlutun listabókstafs byggir á óskum stjórnmálasamtakanna með hliðsjón af listabókstöfum annarra stjórnmálasamtaka sem eru á skránni yfir þá sem buðu fram í síðustu kosningum.
Umsókn um nýja listabókstafi og staðfestingu á heiti nýrra stjórnmálasamtaka
Dómsmálaráðuneytið tekur við umsóknum um nýja listabókstafi og staðfestingu á heiti nýrra stjórnmálasamtaka.
Umsóknin þarf að uppfylla eftirfarandi skilyrði:
a. umsókn verður að berast ráðuneytinu eigi síðar en þremur sólarhringum áður en framboðsfrestur rennur út
b. umsókn skal fylgja yfirlýsing a.m.k. 300 kjósenda
c. skýrt þarf að koma fram í yfirlýsingunni að mælt sé með heiti samtakanna og úthlutun tiltekins listabókstafs
d. yfirlýsingin skal dagsett, og þar skal koma fram nafn meðmælanda, kennitala hans og heimili.
e. heiti stjórnmálasamtakanna má ekki vera þannig að ætla megi að villst verði á því og heiti samtaka sem þegar eru á skrá um listabókstafi og heiti stjórnmálasamtaka.
Þegar umsóknin berst ráðuneytinu er stjórnmálasamtökum sem eru á skrá yfir þá sem buðu síðast fram í kosningum tilkynnt um umsóknina. Telji ráðuneytið að ætla megi að villst verði á heiti nýrra stjórnmálasamtaka og þeirra samtaka sem þegar eru á skránni skal samtökunum gefinn hæfilegur frestur til að bæta úr. Uppfylli umsókn skilyrðin staðfestir ráðuneytið heiti stjórnmálasamtakanna og ákveður bókstaf þeirra.
Þegar tekin hefur verið ákvörðun um listabókstaf og heiti skal títtnefnd skrá uppfærð og birt í B deild Stjórnartíðinda og tilkynnt landskjörstjórn og yfirkjörstjórnum.
Stjórnmálasamtakaskrá
Ríkisskattstjóri skráir stjórnmálasamtök samkvæmt lögum um starfsemi stjórnmálasamtaka nr. 162/2006 og starfrækir stjórnmálasamtakaskrá í því skyni. Stjórnmálasamtakaskrá er birt á vef Skattsins ásamt upplýsingum sem fylgja umsókn um skráningu.
