Stuttmyndasamkeppnin SEXAN hefur verið haldin tvisvar með fjármagni úr aðgerð A.7. Samkeppnin er hýst er á vef Neyðarlínunnar 112.is og hefur verið unnin í samstarfi fulltrúa stýrihóps Þingsályktunar um forvarnir gegn kynferðislegu og kynbundnu ofbeldi og áreitni og fulltrúa frá RLS, Neyðarlínunni, Reykjavíkurborg, Fjölmiðlanefnd, Samskiptafulltrúa íþrótta- og æskulýðsstarfs og RÚV. Samkeppnin fer þannig fram að öllum 7. bekkjum grunnskóla landsins er boðin þátttaka og fá þau fræðslu og tækifæri til að búa til og skila inn tilbúinni stuttmynd um eina eða fleiri af fjórum birtingarmyndum stafræns ofbeldis: samþykki, nektarmyndir, tælingu eða slagsmál ungmenna. Að auki var bætt var við opnum flokki á þessu ári þar sem þátttakendum gafst færi á að koma sínum áherslum á framfæri.

Þó að verkefninu sé formlega lokið er markmiðið er að samkeppnin verði að árlegum viðburði þar sem nemendur 7. bekkja sjá um að búa til fræðsluefni fyrir börn og ungmenni með þeirri nálgun sem þau kjósa, og með því orðfæri sem þau kjósa og er undirbúningur fyrir SEXUNA 2025 þegar hafinn.