Lýsing á aðgerð
Kynjuð hagstjórn og fjárlagagerð.
Unnið verði að kynjaðri hagstjórn og fjárlagagerð samkvæmt innleiðingaráætlun til fimm ára. Árlega verði unnið að jafnréttismati á málefnasviðum og málaflokkum hins opinbera og helstu niðurstöður birtar í grunnskýrslu í upphafi hvers árs sem nýtist sem grunnur að ákvörðunum varðandi markmið og áherslur innan málefnasviða og málaflokka hins opinbera. Þær áherslur birtist í fjármálaáætlun til fimm ára og fjárlagafrumvarpi hvers árs. Verkefnisstjórn geri tillögur um eftirfylgni innleiðingaráætlunar með mælikvörðum fyrir öll ráðuneyti. Á grunni reynslunnar af notkun aðferða kynjaðrar fjárlagagerðar verði aðferðafræðin nýtt frekar við umræður og ákvarðanatöku um útgjöld og tekjuöflun ríkisins. Verkefnisstjórn um kynjaða fjárlagagerð vinni í virku samráði og samstarfi við verkefnisstjórn um samþættingu kynja- og jafnréttissjónarmiða í stefnumótun og ákvarðanatöku Stjórnarráðsins og ríkisstofnana sem og við jafnréttisfulltrúa ráðuneyta.
Tímaáætlun: Viðvarandi verkefni.
Kostnaðaráætlun: Laun sérfræðings í fullu starfi.
Ábyrgð: Fjármála- og efnahagsráðuneytið og verkefnisstjórn kynjaðrar fjárlagagerðar.
Heimsmarkmið Sameinuðu þjóðanna: Styður einkum markmið 5.1, 5.c og 10.4.
Staða verkefnis
Kynjuð hagstjórn og fjárlagagerð er viðvarandi verkefni og unnið er samkvæmt fimm ára áætlun um kynjaða fjárlagagerð 2019-2023. Jafnréttismat á málefnasviðum og málaflokkum hins opinbera hefur verið uppfært og birtist í skýrslunni Kortlagning kynjasjónarmiða – Stöðuskýrsla 2021 sem birt var í mars 2021. Stöðuskýrslan nýtist m.a. við ákvarðanatöku um ráðstafanir í opinberum fjármálum. Við mótun fjármálaáætlunar er byggt á upplýsingum úr stöðuskýrslunni sem og úr drögum að nýrri stöðuskýrslu, þar sem það á við. Í greinargerðum málefnasviða er þannig fjallað um helstu áskoranir og tækifæri til úrbóta er snúa að stöðu kynjanna og jafnréttismálum. Frá árinu 2021 skila ráðuneyti upplýsingum um mat á jafnréttisáhrifum með tillögum sínum fyrir fjármálaáætlun og fjárlagafrumvarp. Upplýsingar um áhrif tillagna á jafnrétti liggja þannig fyrir við ákvarðanatöku í ráðherranefnd um ríkisfjármál og í ríkisstjórn. Á grunni mats ráðuneytanna er í greinargerð með frumvarpi til fjárlaga gerð grein fyrir mati á jafnréttisáhrifum helstu ráðstafana sem þar eru lagðar til, bæði á tekju- og gjaldahlið, líkt og kveðið er á um í 18. gr. laga nr. 123/2015 um opinber fjármál. Frá upphafi heimsfaraldurs hefur verið lagt mat á áhrif efnahagsaðgerða á jafnrétti og birtist matið í viðeigandi frumvörpum til fjárlaga og fjáraukalaga. Þá er samantekt á matinu birt á vef Stjórnarráðsins.
Í samræmi við fimm ára áætlun um kynjaða fjárlagagerð 2019-2023 og aðgerð 5 í framkvæmdaáætlun í jafnréttismálum 2020-2023 hefur verið skipaður starfshópur um kyngreind tölfræðigögn. Markmið með vinnu starfshópsins er að bæta yfirsýn yfir kyngreind tölfræðigögn og stuðla að því að söfnun og notkun á kyngreindum tölfræðigögnum hjá opinberum aðilum verði gerð með sambærilegum hætti.
Gerður hefur verið samstarfssamningur við námsbraut í kynjafræði við Háskóla Íslands um nemendaverkefni í Hagnýtingu jafnréttisfræða sem unnin eru í samstarfi við Stjórnarráðið. Þá vinna meistaranemar í kynjafræði einnig að lokaritgerðum í samstarfi við Stjórnarráðið.
Verkefninu er lokið.
Ábyrgð
Fjármála- og efnahagsráðuneytið