Markvert á árinu

Ný þróunaráætlun Kadeco – K64

Ný þróunaráætlun Kadeco fyrir nærsvæði Keflavíkurflugvallar, K64, var kynnt í mars. Áætlunin fellur vel að markmiðum ríkisstjórnarinnar sem miða að því að verja og tryggja efnahagslega velsæld og stöðugleika í ólgusjó undanfarinna ára.

Áætlunin felur í sér heildstæða sýn á uppbyggingu í kringum Keflavíkurflugvöll á ákveðnum þróunarsvæðum sem saman mynda vistkerfi sem einkennist af samvinnu og sambúð iðnaðar, samgangna, nýsköpunar og sjálfbærrar byggðaþróunar. Þróunaráætlunin nær til ársins 2050 en fyrstu skrefin verða tekin strax. Má þar nefna þróun grænna iðngarða við Helguvíkurhöfn, bættar almenningssamgöngur á milli flugvallar og höfuðborgar, tilraunir með eftirspurnardrifnar almenningssamgöngur og uppbygging íbúða á Ásbrú.

Ársfundur ríkisfyrirtækja

Sjálfbærni í rekstri fyrirtækja var yfirskrift ársfundar ríkisfyrirtækja 2023 sem fjármála- og efnahagsráðuneytið hélt á árinu 2023. Bætt yfirsýn, aukið gagnsæi og samfélagslega arðbær og ábyrgur rekstur voru leiðarstef ríkisins og á fundinum. Á fundinn sóttu stjórnarfólk og forstjórar ríkisfyrirtækja til að eiga samtal um áherslur eiganda og fyrirtækjanna sjálfra.   

Metár hjá Landsvirkjun

Árið 2023 var besta rekstrarár í tæplega 60 ára sögu Landsvirkjunar. Hagnaður af grunnrekstri var um 52 milljarðar króna og jókst um 19% frá árinu 2022 og fjárhagsstaða fyrirtækisins hefur aldrei verið betri. Landsvirkjun greiddi út 30 milljarða í arð til ríkissjóðs í samræmi við þeirra arðgreiðslustefnu. Þetta er hæsta arðgreiðsla í sögu fyrirtækisins.

Á árinu fékk Landsvirkjun umhverfisverðlaun Samtaka atvinnulífisins, þar sem tekið var fram að fyrirtækið hefur verið með vottað umhverfisstjórnunarkerfi í hátt í 20 ár og hefur sýnt framsýni og forystu þegar kemur að útgáfu og birtingu umhverfisupplýsinga og aðgerða. Einnig var tekið fram að Landsvirkjun færi lengra en lög og reglur kváðu varðandi tillitssemi til umhverfisins og það hafi verið fyrst íslenskra fyrirtækja til að fá hæstu einkunn fyrir stýringu eigin loftlagsáhrifa frá alþjóðlegu samtökunum CDP.

Helstu verkefni Nýs Landspítala ohf. á árinu

Nýr Landspítali ohf. (NLSH) vann að fjölmörgum verkefnum áfram við Hringbraut. Byggingu meðferðarkjarna, rannsóknahúss, bílakjallara, bílastæða- og tæknihúss ásamt tengigöngum. Þá var einnig unnið að nýbyggingu Heilbrigðisvísindasviðs Háskóla Íslands ásamt endurbótum á Læknagarði.

NLSH hefur einnig hafið hönnun og byggingu á nýrri viðbyggingu við Grensás, endurhæfingardeild Landspítala. Á vegum félagsins er hafin undirbúningur að nýju legudeildarhúsi fyrir Sjúkrahúsið á Akureyri. Þá er NLSH að vinna að allir þættir sem snúa að upplýsingatækni þ.m.t. hugbúnaður og vél- og tæknibúnaður séu til staðar við flutning LSH í nýjar byggingar.

Uppbyggingar og framkvæmdaár hjá Isavia

Árið 2023 var það þriðja stærsta í sögu Keflavíkurflugvallar. 7,8 milljónir farþega fóru um flugvöllinn samanborið við 6,1 milljón árið á undan. 28 flugfélög flugu til 95 áfangstaða víða um heim.

Á árinu 2023 var hrundið af stað framkvæmdum við nýja komuverslun Fríhafnarinnar, dótturfélags Isavia ohf., í verulega endurbættum töskusal flugstöðvarinnar á Keflavíkurflugvelli sem lokið var við árið 2024. Breytingarnar skila umtalsvert meira rými fyrir viðskiptavini verslunarinnar og tækifærum til að bjóða upp á meira og fjölbreyttara vöruúrval. 

Á árinu 2023 var ekki bara ráðist í framkvæmdir við Fríhafnarverslun á Keflavíkurflugvelli heldur stækkun vallarins með nýrri austurálmu. Hún mun bæta enn frekar þjónustuna við ferðafólk og flugfélög. Flugvélahliðum fjölgar sem og veitingastöðum og verslunum. Stórt biðsvæði verður opnað fyrir farþega og þægindi aukin. Auk austurálmu var lokið við framkvæmd á flugbrautakerfinu í fyrra. Þá var ný akbraut, Mike, tekin í notkun árið 2023. Brautin er 1200 metra löng og 35 metra breið.