Hvað er velsældarhagkerfi?

Í velsældarhagkerfi hafa skýr markmið um hagsæld og lífsgæði almennings áhrif á áherslur og forgangsröðun stjórnvalda við ákvarðanatöku og áætlanagerð. Teknar eru saman mælingar á mismunandi þáttum velsældar í víðum skilningi sem lagðar eru til grundvallar við stefnumótun stjórnvalda. Takmarkið er að ráðstafanir í ríkisfjármálum styðji við markmið stjórnvalda um bætt lífsgæði fólks. Mælikvarðar eru jafnframt nýttir til að meta langtímaáhrif af ákvörðunum stjórnvalda við fjárlagagerð. 

Dæmi um mælikvarða í fjármálaáætlun fyrir árin 2024-2028 eru mælingar á hlutfalli endurnýjanlegra orkugjafa í samgöngum og gerir umhverfis-, orku- og loftslagsráðuneytið grein fyrir stöðu og áætlaðri þróun á gildistíma áætlunarinnar. Í frumvarpi til fjárlaga fyrir árið 2024 er svo gerð grein fyrir aðgerðum sem stuðla að því að settu markmiði verði náð og breytingum á fjármagni til þeirra. Þannig er lagt upp með að nýjar útgjaldaráðstafanir styðji við sett markmið og tengingar þar á milli gerðar sýnilegar og árangri fylgt eftir.