Skjaldarmerki

Skjaldarmerki Íslands er silfurlitur kross í heiðbláum feldi, með eldrauðum krossi innan í silfurlita krossinum. Armar krossanna skulu ná alveg út í rendur skjaldarins á alla fjóra vegu. Breidd krossmarksins skal vera 2/9 af breidd skjaldarins, en rauði krossinn helmingi mjórri, 1/9 af breidd skjaldarins. Efri reitirnir skulu vera rétthyrndir, jafnhliða ferhyrningar og neðri reitirnir jafnbreiðir efri reitunum, en þriðjungi lengri.

Skjaldberar eru hinar fjórar landvættir, sem getur í Heimskringlu: Griðungur, hægra megin skjaldarins, bergrisi, vinstra megin, gammur, hægra megin, ofan við griðunginn, og dreki, vinstra megin, ofan við bergrisann.

Skjöldurinn hvílir á stuðlabergshellu.

Nánari upplýsingar um hinar fjórar landvættir má sjá í kafla um sögu Landvættaskjaldarmerkisins

Merki ráðuneyta

Merki ráðuneyta er skjaldarmerkið með heiti viðkomandi ráðuneytis.

Hægt er að sækja merkin þar sem þau eru á nokkrum mismunandi sniðum fyrir prent- og skjámiðla. 

Notkun skjaldarmerkisins

Skjaldarmerki Íslands er auðkenni stjórnvalda ríkisins. Notkun ríkisskjaldarmerkisins er þeim einum heimil. Leyfi til notkunar á skjaldarmerki Íslands og nánari upplýsingar veitir forsætisráðuneytið, [email protected].

Litir í skjaldarmerkinu

Geti miðlar, svo sem skjámiðlar, ekki sýnt silfur eða gull þá skal krossinn í skildinum vera hvítur.

Bakgrunnur og nálægð við skjaldarmerkið

Bakgrunnur skjaldarmerkisins skal vera hvítur, þó er heimilt að nota skjaldarmerkið í línuteikningu á lituðum bakgrunni. Hringur afmarkar æskilegan hreinan flöt umhverfis merkið (sjá mynd).

Hlutföll skjaldarmerkisins

Skjaldarmerki Íslands er silfurlitur kross í heiðbláum feldi með eldrauðum krossi innan í silfurlita krossinum. Armar krossanna skulu ná alveg út í rendur skjaldarins á alla fjóra vegu. Breidd krossmarksins skal vera 2/9 af breidd skjaldarins, en rauði krossinn helmingi mjórri, 1/9 af breidd skjaldarins. Efri reitirnir skulu vera rétthyrndir, jafnhliða ferhyrningar og neðri reitirnir jafnbreiðir efri reitunum, en þriðjungi lengri.  (Forsetaúrskurður 17. júní 1944.)

Rétt mæling skjaldarmerkisins er sýnd á meðfylgjandi mynd.

Lög og stjórnvaldsfyrirmæli