Loftslagsráð

Loftslagsráð hefur það meginhlutverk að veita stjórnvöldum aðhald og markvissa ráðgjöf um stefnumarkandi ákvarðanir og markmið Íslands sem tengjast loftslagsmálum.

Verkefni ráðsins eru skv. lögum eftirtalin:

• veita ráðgjöf um samdrátt í losun gróðurhúsalofttegunda og aðgerðir til að auka kolefnisbindingu
• veita ráðgjöf um aðlögun að loftslagsbreytingum
• rýna á undirbúningsstigi áætlanir stjórnvalda sem snerta loftslagsmál
• hafa yfirsýn yfir miðlun fræðslu og upplýsinga um loftslagsmál til almennings, fyrirtækja, stofnana og sveitarfélaga
• rýna tillögur sem berast frá fagstofnunum um vöktun og rannsóknir sem tengjast loftslagsbreytingum
• vinna að öðrum verkefnum sem ráðherra felur ráðinu hverju sinni

Vorið 2024 tók gildi reglugerð nr. 334/2024 um Loftslagsráð. Kveður reglugerðin m.a. á um hæfniviðmið sem ráðherra skal hafa til hliðsjónar við skipan fulltrúa og vettvang til að tryggja reglulegt samtal við hagaðila.

Samkvæmt reglugerðinni skulu fulltrúar Loftslagsráðs búa yfir þekkingu og reynslu á a.m.k. einum af eftirtöldum málaflokkum á sviði loftslagsmála og fullskipað skal það búa yfir þekkingu á öllum ofangreindum sviðum:

• Loftslagsrétti, stjórnsýslu og stefnumótun
• Loftslagsvísindum, áhættugreiningum og náttúruvá
• Skipulagi og landnýtingu
• Hagrænum og samfélagslegum greiningum
• Samfélagslegum breytingum og réttlátum umskiptum
• Líffræðilegum fjölbreytileika, kolefnishringrás lands og vistkerfisþjónustu
• Nýsköpun og tækniþróun
• Orkumálum í samhengi orkuskipta og kolefnishlutleysis

Fulltrúar í Loftslagsráði eru einungis bundnir af eigin dómgreind og er það áréttað í fyrrnefndri reglugerð. Skipað var í ráðið 2024 og er skipunartími 4 ár.

Sjá nánar um Loftslagsráð á vefnum lofslagsrad.is

Loftslagsráð er með skrifstofu í húsi Veðurstofunnar, Bústaðarvegi 7, 105 Reykjavík, sími 522 6000. Anna Sigurveig Ragnarsdóttir, [email protected] er framkvæmdastjóri Loftslagsráðs.