Náttúruvernd

Stjórnvöldum ber skylda til að vernda íslenskra náttúru og fjölbreytni hennar fyrir komandi kynslóðir, s.s. líffræðilega og jarðfræðilega fjölbreytni, óbyggð víðerni og fjölbreytni landslags. Mikilvægt er að vernda það sem er sérstætt en einnig að stuðla að því að endurheimta röskuð vistkerfi og auka þol íslenskra vistkerfa gegn náttúruhamförum og hnattrænum umhverfisbreytingum.

Nýta þarf náttúruauðlindir á sjálfbæran hátt og stuðla að því að með umgengni sinni spilli maðurinn ekki náttúrunni. Um leið er mikilvægt að auðvelda fólki að upplifa og kynnast náttúrunni.

Meðal verkefna á þessu sviði eru stjórnun landnýtingar, friðlýsing lands, búsvæða og tegunda, umsjón þjóðgarða og annarra friðlýstra svæða, stjórnun veiða og vöktun og rannsóknir á náttúrunni.