Alþjóðamál

Virðing fyrir þjóðarétti og fjölþjóðasamvinna eru smáum herlausum ríkjum eins og Íslandi afar mikilvæg. Hlutverk utanríkisþjónustunnar er að viðhalda traustum alþjóðatengslum, gæta hagsmuna Íslands í hvívetna og tryggja að rödd Íslands heyrist á alþjóðavettvangi. Ýmsar skyldur felast í aðild Íslands að alþjóðasamningum, alþjóðlegu regluverki og dómstólum en jafnframt réttindi sem geta skipt miklu um þjóðarhag.

Að undanförnu hefur verið vegið að fjölþjóðakerfinu sem reist er á þessum sömu gildum. Ísland skipar sér í framvarðasveit þeirra ríkja sem standa vilja slá skjaldborg um alþjóðalög og grunngildi mannréttinda, frelsis og lýðræðis, og leggja íslensk stjórnvöld sitt af mörkum í því augnamiði. Stuðningur við Úkraínu er hér lykilþáttur.

Náið samstarf Norðurlandanna og Eystrasaltsríkjanna, aðild Íslands að Atlantshafsbandalaginu og sterk tengsl við einstök bandalagsríki eru grundvallarþáttur í utanríkisstefnu Íslands og framkvæmd hennar. Á vettvangi Sameinuðu þjóðanna og annarra alþjóðastofnana beita íslensk stjórnvöld sér í þágu virðingar fyrir alþjóðalögum, mannréttinda, jafnréttis, friðsamlegra lausna og sjálfbærrar þróunar, þ.m.t. loftslagsmála og hafmála. Þá hefur Ísland mikilla hagsmuna að gæta á norðurslóðum, bæði hvað varðar öryggi og varnir landsins og sjálfbærni svæðisins.

Nánar er fjallað um alþjóða- og utanríkismál í árlegri skýrslu utanríkisráðherra til Alþingis og í umfjöllun um einstaka málaflokka á vef Stjórnarráðsins.