Hagsmunamat fyrir börn í allri stefnumótun
Í dag er dagur mannréttinda barna og markar dagurinn 35 ára afmæli Barnasáttmála Sameinuðu þjóðanna. Mennta- og barnamálaráðuneytið hefur gefið út leiðarvísi um hagsmunamat út frá réttindum barna í allri stefnumótun stjórnvalda. Markmiðið er að stjórnvöld hugi markvisst að því hvaða áhrif ákvarðanir þeirra hafa á börn og réttindi þeirra og hvort og þá með hvaða hætti er nauðsynlegt að bregðast við þeim áhrifum.
Hagsmunamatið er hluti af innleiðingu barnasáttmálans hérlendis samkvæmt þingsályktun um barnvænt Ísland. Í þingsályktuninni kemur fram að hagsmunamat út frá réttindum barna skuli vera hluti af skyldubundnu ferli við undirbúning lagafrumvarpa, stefnumótandi ákvarðana og ákvarðana um réttindi einstakra barna.
Vinna hefur staðið yfir í mennta- og barnamálaráðuneytinu í samvinnu við umboðsmann barna við að útfæra hagsmunamatið sem leiðarvísi og eyðublað. Lögð hefur verið áhersla á að leiðarvísirinn sé aðgengilegur og einfaldur í notkun. Hann verði innleiddur í öllum ráðuneytum þannig að frumvörp, reglugerðir, stefnur og aðrar stefnumótandi ákvarðanir sem stjórnvöld taka fari ávallt í gegnum barnvænt hagsmunamat þegar ákvarðanir hafa áhrif á börn.
Mennta- og barnamálaráðuneytið hefur samið við umboðsmann barna um að styðja við innleiðingu á hagsmunamatinu hjá Stjórnarráðinu og gefa út fræðslu- og kynningarefni um framkvæmd matsins.