Byggðamálaráð

Innviðaráðherra hefur skipað byggðamálaráð skv. 2. gr. a. laga nr. 69/2015 um byggðaáætlun og sóknaráætlanir, sbr. 8. gr. laga nr. 53/2018 um breytingu á ýmsum lögum til samræmingar á áætlunum á sviði samgöngu-, fjarskipta-, sveitarstjórnar- og byggðamála. Byggðamálaráð gerir tillögu til ráðherra að stefnumótandi byggðaáætlun og fimm ára aðgerðaáætlun að fengnum áherslum ráðherra.

Við undirbúning byggðaáætlunar og fimm ára aðgerðaáætlunar skal haft samráð við öll ráðuneyti á vettvangi stýrihóps Stjórnarráðsins um byggðamál, sbr. 2. gr. laga nr. 69/2015. Þá skal haft samráð við Samband íslenskra sveitarfélaga og sveitarfélög. Horfa skal einnig til þeirrar stefnumörkunar sem fram kemur í stefnumótandi áætlun ríkisins um málefni sveitarfélaga sem gerð er samkvæmt sveitarstjórnarlögum. Loks skal haft samráð við hagsmunaaðila eftir þörfum og skal almenningi gefinn kostur á að koma að sjónarmiðum sínum og athugasemdum í opnu samráðsferli. Skipunartími byggðamálaráðs takmarkast við ákvörðun ráðherra eða embættistíma hans.

Byggðamálaráð er þannig skipað:

• Guðveig Lind Eyglóardóttir, formaður, fulltrúi innviðaráðherra,
• Eiríkur Vilhelm Sigurðarson, fulltrúi innviðaráðherra,
• Karl Björnsson, fulltrúi Sambands íslenskra sveitarfélaga,
• Arnar Már Elíasson, forstjóri Byggðastofnunar,
• Hólmfríður Sveinsdóttir, fulltrúi skrifstofu sveitarfélaga og byggðamála og jafnframt verkefnisstjóri byggðamálaráðs.

Með byggðamálaráði starfa skrifstofustjóri sveitarfélaga og byggðamála og  aðstoðarmenn ráðherra eftir atvikum.

Byggðamálaráð tekur við ábendingum í netfangið [email protected].

• Sjá fundargerðir byggðamálaráðs
• Stefnumótandi byggðaáætlun fyrir árin 2022-2036