Þjóðhátíðargjöf Norðmanna

Þjóðhátíðargjöf Norðmanna er styrktarsjóður sem úthlutar uppsöfnuðum vöxtum að þjóðargjöf Noregs til íslensku þjóðarinnar í tilefni af 1100 ára afmæli Íslandsbyggðar árið 1974. Styrkir voru fyrst veittir úr sjóðnum árið 1976. Sjóðurinn starfar samkvæmt staðfestri skipulagsskrá nr. 279/1975. Með breytingu nr. 988/2009.

Samkvæmt skipulagsskrá fyrir sjóðinn er tilgangur hans „að auðvelda Íslendingum að ferðast til Noregs. Í þessu skyni skal veita viðurkenndum félögum, samtökum og skipulögðum hópum ferðastyrki til Noregs í því skyni að efla samskipti þjóðanna t.d. með þátttöku í mótum, ráðstefnum eða kynnisferðum, sem efnt er til á tvíhliða grundvelli“. Í skipulagsskránni segir einnig, að áhersla skuli lögð á að veita styrki, sem renna til beins ferðakostnaðar, en umsækjendur beri sjálfir dvalarkostnað í Noregi.

• Mennta- og menningarmálaraðuneyti tekur við styrkumsóknum og veitir nánari upplýsingar um sjóðinn.
• Styrkjum er að jafnaði úthlutað árlega.
• Mennta- og menningarmálaráðherra skipar þriggja manna stjórn til fjögurra ára í senn.
• Eyðublað fyrir umsóknir í sjóðinn Þjóðhátíðargjöf Norðmanna
  Athugið til þess að fylla út eyðublaðið í tölvu þarft þú að hafa Adobe Reader forritið.

Núverandi stjórn sjóðsins Þjóðhátíðargjöf Norðmanna:
Skipuð af mennta- og menningarmálaráðherra til 14. mars 2015

• Snjólaug Ólafsdóttir formaður
• Ásdís Egilsdóttir
• Dag Wernø Holter

Skipulagsskrá

Skipulagsskrá fyrir sjóðinn Þjóðhátíðargjöf Norðmanna (nr. 279 frá 30. maí 1975, sbr. auglýsingu nr. 199 frá 25. mars 1998 og auglýsingu nr. 295 frá 26. apríl 1999 um breytingu á skipulagsskrá fyrir sjóðinn Þjóðhátíðargjöf Norðmanna)

Stofnfé sjóðsins er gjöf frá norsku þjóðinni í tilefni 1100 ára búsetu á Íslandi.

Forsætisráðuneytið hefur í samráði við ríkisstjórnina sett sjóðnum eftirfarandi skipulagsskrá:

1. gr.
Stofnfé sjóðsins 1 000 000.00 - ein milljón norskra króna - sem norska stórþingið samþykkti að gefa Íslendingum, skal mynda höfuðstól sjóðsins. Höfuðstólinn má auka með fjárupphæðum, sem síðar kunna að berast sjóðnum.

2. gr.
Höfuðstóll sjóðsins skal varðveittur á Íslandi eða í Noregi eftir ákvörðun sjóðstjórnar, sem ber ábyrgð á ávöxtun hans.

3. gr.
Tilgangur sjóðsins er að auðvelda Íslendingum að ferðast til Noregs. Í þessu skyni skal veita viðurkenndum félögum, samtökum, og skipulögðum hópum ferðastyrki til Noregs í því skyni að efla samskipti þjóðanna t.d. með þáttöku í mótum, ráðstefnum, eða kynnisferðum, sem efnt er til á tvíhliða grundvelli. Ekki skal úthlutað ferðastyrkjum til einstaklinga, eða þeirra sem eru styrkhæfir af öðrum aðilum.

4. gr.
Reikningsár sjóðsins er almanaksárið og skal ársskýrsla sjóðstjórnar afhent forsætisráðuneytinu fyrir 1. febrúar hvert ár.

5. gr.
Höfuðstóll sjóðsins skal standa óskertur, en vaxtatekjum hans skal ráðstafað árlega til að stuðla að tilgangi sjóðsins.

6. gr.
Styrkir úr sjóðnum skulu auglýstir til umsóknar í fjölmiðlum samkvæmt nánari ákvæðum er sjóðstjórn ákveður. Lögð skal áhersla á að veita styrki sem renna til beins ferðakostnaðar, en umsækjendur beri sjálfir dvalarkostnað í Noregi.

7. gr.
Í stjórn sjóðsins skulu vera þrír menn; sendiherra Noregs á Íslandi skal sjálfskipaður, en tveir stjórnarmanna skulu skipaðir af forsætisráðuneytinu til fjögurra ára í senn. Láti stjórnarmaður af störfum fyrir lok starfstímabils skal strax skipa annan mann í hans stað er sitji út skipunartímann. Stjórnin kýs formann og varaformann úr sínum hóp.

8. gr.
Forsætisráðuneytið sér um ritara- og skrifstofustörf sjóðsins samkvæmt nánara samkomulagi milli ráðuneytisins og sjóðstjórnar.

9. gr.
Kostnaður vegna starfa stjórnar er greiddur úr sjóðnum.

10. gr.
Ef nauðsyn krefur setur stjórnin sér starfsreglur er hafa að geyma nánari fyrirmæli um starfsemi sjóðsins.

11. gr.
Skipulagsskrá þessari má breyta í samráði við forsætisráðuneytið.

12. gr.
Leita skal staðfestingar forseta Íslands á skipulagsskrá þessari.