Viðurkenning fræðsluaðila

Mennta- og barnamálaráðuneytið fer með málefni framhaldsfræðslu skv. lögum um framhaldsfræðslu nr. 27/2010. Fræðsluaðilar í framhaldsfræðslu eru viðurkenndir á grundvelli 7. gr. laganna og jafnframt gildir um þá reglugerð um framhaldsfræðslu nr. 1163/2011. Félags- og vinnumarkaðsráðherra hefur falið mennta- og barnamálaráðuneytinu að veita fræðsluaðilum viðurkenningu til þess að annast framhaldsfræðslu.

Fræðsluaðili sem veitir framhaldsfræðslu getur sótt um viðurkenningu til mennta- og barnamálaráðuneytisins. Í viðurkenningu felst staðfesting á því að starfsemi fræðsluaðila uppfylli almenn skilyrði laganna og reglna sem settar eru með stoð í þeim, á þeim tíma sem viðurkenning er veitt. Hún felur ekki í sér skuldbindingu um fjárframlög úr ríkissjóði til viðkomandi fræðsluaðila eða ábyrgð á skuldbindingum hans. Þá veitir hún nemendum ekki sjálfkrafa rétt til fyrirgreiðslu úr Menntasjóði námsmanna.

Birtur er listi yfir þá fræðsluaðila í framhaldsfræðslu sem hlotið hafa formlega viðurkenningu  skv. 7. gr. laga um framhaldsfræðslu nr. 27/2010.

Um framhaldsfræðslu og fyrir hverja hún er

Framhaldsfræðsla er hvers konar nám, úrræði og ráðgjöf sem er ætlað að mæta þörfum einstaklinga með stutta formlega skólagöngu að baki og er ekki skipulagt á grundvelli laga um framhaldsskóla eða háskóla, þ.e. einstaklinga sem hafa hætt námi í formlega skólakerfinu áður en skilgreindum námslokum var náð.

Bjóði fræðsluaðili jafnframt upp á fræðslu fyrir börn og ungmenni í starfsemi sinni er því nauðsynlegt að í umsókn sé eingöngu fjallað um þann hluta sem viðurkenning getur tekið til, þ.e. framhaldsfræðslu.

Umsókn um viðurkenningu fræðsluaðila

Við afgreiðslu umsókna er gengið úr skugga um að starfsemi viðkomandi fræðsluaðila uppfylli einstaka þætti skilyrða laga um framhaldsfræðslu nr. 27/2010 og reglugerðar um framhaldsfræðslu nr. 1163/2011.

Mikilvægt er að umsækjandi kynni sér öll skilyrði laga og reglna um starfsemi fræðsluaðila áður en sótt er um viðurkenningu. Þá er nauðsynlegt að öllum tilskildum fylgiskjölum sé skilað með umsókn, hvort sem um nýja umsókn er að ræða eða endurnýjun.

Umsókn og fylgigögnum skal skilað í tölvupósti á [email protected] og skal berast frá eiganda eða stjórn fræðsluaðila.

Eitt skilyrða fyrir veittri viðurkenningu er að húsnæði sem umsækjandi notar til reglubundinnar kennslustarfsemi fái jákvæða umsögn slökkviliðs um eldvarnir. Mennta- og barnamálaráðuneytið sendir beiðni um úttekt slökkviliðs þegar umsókn berst ráðuneytinu á kostnað umsækjanda viðurkenningar. Gjald vegna úttektar er innheimt af slökkviliði í því umdæmi sem kennsluhúsnæði er staðsett. Ef umsögn slökkviliðs liggur þegar fyrir, má hún ekki vera eldri en 6 mánaða gömul. Eigandi og/eða forráðamaður húsnæðisins þarf að sjá til þess að húsnæði uppfylli kröfur í samræmi við reglugerð nr. 723/2017 um eldvarnir og eldvarnaeftirlit.

Umsókn um endurnýjun viðurkenningar ásamt fylgigögnum skal senda til ráðuneytisins að lágmarki þremur mánuðum áður en hún rennur út.

Umsóknarsniðmát og fylgiskjöl

Fylla skal út eftirfarandi skjöl:

1. Umsókn um viðurkenningu
2. Greinargerð um fjárhag umsækjanda
   Fjárhagsáætlunin skal vera rökstudd og samanburðarhæf við tölur í ársreikningum. Hver fjárhagsáætlun skal endurspegla raunhæfar áætlanir fyrir hvert ár. Ef þurfa þykir, má krefjast bankatryggingar af fræðsluaðila.
3. Yfirlit yfir fjárhag umsækjanda

Fylgigögn með umsókn:

• Ársreikningar síðustu þriggja ára
• Vottorð heilbrigðisyfirvalda: leggja skal fram starfsleyfi og nýjustu niðurstöðu reglubundins eftirlits heilbrigðiseftirlits.

Út frá þessum gögnum verður m.a. metið:

• Fjárhagsleg ábyrgð
• Fjármögnun starfseminnar
• Fjárhagslegt rekstraröryggi
• Hvort nemendur geti lokið námi sínu
• Aðstaða til kennslu

Nýir fræðsluaðilar sem hefja starfsemi og sækja um viðurkenningu skulu sundurliða áætlanir um rekstur sérstaklega vel. Fyrsta viðurkenning gildir í eitt ár og skal fjárhagsáætlun því ná yfir líðandi ár og næsta ár. Í stað ársreikninga skulu stofnskjöl, svo sem samþykktir, skipulagsskrá o.þ.h., auk staðfestingar á greiðslu stofnframlags/hlutafjár og skuldbindinga eigenda fylgja umsókninni.