Stefnumótun í málefnum innflytjenda

Stefnumótun í málefnum innflytjenda á Íslandi stendur nú yfir. Þetta er í fyrsta sinn sem íslenska ríkið mótar sér stefnu á málefnasviðinu. 

• Í nóvember 2023 kom út grænbók sem innihélt stöðumat og valkosti. Hægt var að senda inn umsögn um grænbókina.
• Í framhaldinu voru haldnir fundir vítt og breitt um landið þar sem sérstök áhersla var lögð á að heyra raddir innflytjenda. 
• Í maí 2024 kom út hvítbók sem innihélt drög að stefnu. Hægt var að senda inn umsögn um hvítbókina.
• Í kjölfarið hófst vinna við tillögu til þingsályktunar um stefnu og framkvæmdaáætlun í málefnum innflytjenda sem fyrirhugað er að leggja fram á Alþingi á haustþingi 2024. 
• OECD hefur auk þess unnið að viðamikilli úttekt á málefnum innflytjenda á Íslandi. 

Úttekt OECD: Skills and Labour Market Integration of Immigrants and their Children in Iceland

• Miðvikudaginn 4. september 2024 var birt úttekt sem OECD hefur unnið að um málefni innflytjenda á Íslandi. Úttektin er hluti af stefnumótuninni sem nú stendur yfir.
• Úttektin var kynnt á blaðamannafundi og er aðgengileg á vef OECD.
  
  
• Niðurstöður úttektarinnar á íslensku: Mikilvægt að setja inngildingu innflytjenda á dagskrá
• Glærur af blaðamannafundinum: Skills and labour market integration of immigrants and their children in Iceland

Samfélag okkar allra

Tímamót! Drög að fyrstu stefnu Íslands í málefnum innflytjenda liggja fyrir. Hvítbókin er birt á þremur tungumálum: Íslensku, ensku og pólsku auk þess sem hún kemur út á auðlesinni íslensku. Smelltu á myndina til að opna skjalið.

Grænbók: Stöðumat og valkostir

Grænbók kom út í nóvember 2023 og var birt á þremur tungumálum. Grænbókin var undanfari hvítbókarinnar sem nú er komin út.

Jöfn tækifæri 

Framtíðarsýnin í hvítbókinni kjarnast um að skapa samfélag þar sem öll njóta jafnra tækifæra hér á landi, óháð uppruna. Stefnunni er ætlað að ná til áranna 2024-2038. Til að tengja framtíðarsýnina skilgreindum markmiðum eru í hvítbókinni sett fram svokölluð meginmarkmið. Þau lýsa almennum framförum sem ætlað er að ná fram og eru hugsuð til langs tíma. Undir hverju meginmarkmiði eru síðan sett fram markmið um mælanlegan árangur af stefnunni. 

„Innflytjendur á Íslandi eru fjölbreyttur hópur fólks sem flust hefur hingað til lands af ýmsum ástæðum. Stefnu í málefnum innflytjenda er ætlað að tryggja að markvisst sé tekið tillit til þarfa innflytjenda til jafns við aðra, fólk búi við jöfn tækifæri, mannauður sé virkjaður og ljóst sé hvaða kröfur gerðar séu til fólks og samfélagsins í heild,“ segir Guðmundur Ingi Guðbrandsson, félags- og vinnumarkaðsráðherra.