Vinnumarkaðsaðgerðir

Lög um vinnumarkaðsaðgerðir gilda um vinnumarkaðsaðgerðir en með því er samkvæmt lögunum átt við vinnumiðlun, mat á hæfni atvinnuleitanda og skipulag úrræða sem eru til þess fallin að auka vinnufærni atvinnuleitanda.

Í lögum um vinnumarkaðsaðgerðir er jafnframt kveðið á um starfsemi Vinnumálastofnunar og um vinnumarkaðsráð.

Markmið laganna er að veita einstaklingum viðeigandi aðstoð til að verða virkir þátttakendur á vinnumarkaði. Lögunum er einnig ætlað að stuðla að jafnvægi milli framboðs og eftirspurnar eftir vinnuafli í landinu.

Vinnumálastofnun annast framkvæmd laga um vinnumarkaðsaðgerðir í umboði ráðherra. Ráðherra er þó heimilt að ákveða annað fyrirkomulag.

Heimilt er að kæra ákvarðanir Vinnumálastofnunar sem teknar eru á grundvelli laga um vinnumarkaðsaðgerðir til úrskurðarnefndar atvinnuleysistrygginga og vinnumarkaðsaðgerða að tilteknum skilyrðum uppfylltum. Hlutverk úrskurðarnefndarinnar er að kveða upp úrskurði um ágreiningsefni sem kunna að rísa á grundvelli laganna.